थाई बिजा पोटी… फळे रसाळ गोमटी

स्वीटकॉर्न मध्ये १८ टक्क्यापर्यंत साखर असते. जास्तकरून ही साखर सुक्रोज च्या स्वरूपात असते. आपल्या गोडीमुळे मधुमका खवय्यांमध्ये प्रसिद्ध आहे. माणसाच्या खाद्याबरोबरच पशुखाद्य म्हणून मका मोठ्या प्रमाणात वापरला जातो. मक्याचं पीक थाईलँडमध्ये मोठ्या प्रमाणात घेतलं जातं. वर्षाकाठी ५० लाख टन मका थाईलँडमध्ये पिकतो. थाईलँडमध्ये मका दोन हंगामात पेरला जातो. एप्रिल-मे आणि जुलै ऑगस्ट असे दोन हंगाम असतात. दीडशे दिवसाचं हे पीक थाई शेतकऱ्याला चांगला नफा मिळवून देतं. पण गेल्या काही वर्षात शेंडा पोखरणाऱ्या अळीचा मोठा प्रादुर्भाव या पिकात झालाये. या फायद्याच्या पिकाचा नफा, शेंडेअळीने कुरतडला होता. शेंडेआळीला हरवण्यासाठी, मोठ्या प्रमाणात कीटकनाशकांचे फवारे मक्याच्या शेतात उडताहेत.

कोणत्याही व्यवसायाच्या भरभराटीत राजाश्रययाचा मोठा वाट असतो.  थायलंडमधील मक्याच्या भरभराटीला सरकारचा मोठा आधार आहे. मक्याच्या पीक घेणाऱ्या शेतकऱ्यांना सरकार बिनव्याजी कर्ज देतं. मका उत्पादनात थायलंड २५व देश आहे पण निर्यातीत मात्र त्यांचा १५व नंबर लागतो. याउलट घटक चाचणीत पैकीच्या पैकी मार्क मिळवणारा पप्पू बोर्डाच्या परीक्षेत सपशेल नापास व्हावा, तसा मकाउत्पादनात जगात सातवा नंबर मिळवणाऱ्या भारताचं नाव मात्र निर्यातदारांच्या यादीत दूरदूरपर्यंत सापडत नाही.

 मका उत्पादनात जगात २५ व्या नंबरवर असलेला थायलंडने, मक्याच्या बियाण्याच्या बाबतीतही  बाजी मारलीय. थाईलँडमध्ये मका बियाण्याच मोठ्या प्रमाणात उत्पादन होतं. देशांतर्गत आणि निर्यातीत या बियाण्याचा सिंहाचा वाटा आहे. मकाच काय पण इतर पिकांच्या बियाण्यांच्या उत्पादनात त्यांनी मानाचं स्थान पटकावलंय. भाजीपाला, मका, भात यासारख्या बियाण्यांच्या उत्पादनात लहानमोठे थाई शेतकरी व्यग्र असतात. बीजोत्पादन उद्योग थाईलँडमध्ये चांगलाच रुजलाय.

येतील योग्य वातावरण, भौगोलिक परिस्थिती, आवश्यक असलेलं कुशल मनुष्यबळ आणि बहुराष्ट्रीय कंपन्यांनी केलेली गुंतवणूक यामुळे बियाणे व्यवसायाने इथं चांगलंच बाळसं धरलाय. सरकारने योग्य धोरणं राबवून त्याला खतपाणी घातलंय. त्यामुळे मोठमोठ्या बहुराष्ट्रीय कंपन्यांनी गुंतवणूक करत बियाणे विकसित आणि उत्पादित करणारे प्रकल्प इथं राबवले आहेत. बियाणे व्यवसायात परदेशी गुंतवणूक वाढतेय. थायलंड बियाण्यांची खाण आहे असं म्हटलं तरी वावगं ठरणार नाही.